rehber Logo

وفاقی وزیر اطلاعات عطا تارڑ نے کہا ہے کہ سابق وزیراعظم عمران خان کی فائنل کال مس کال ثابت ہوئی، شر پسند اپنی گاڑیاں، سامان اور کپڑے چھوڑ کر فرار ہوئے، تحریک انصاف نے اہم ثبوت مٹانے کیلئے کنٹینر کو خود آگ لگائی، علی امین گنڈاپور اور بشری بی بی ایک ہی گاڑی میں فرار ہوئے، اپنے لیڈر کو رہا کروانے آئے تھے، کارکنوں کو گرفتار کروا کر بھاگ گئے، علی امین کا نام گنڈا پور نہیں بلکہ بھگوڑا ہونا چاہیئے۔

رات گئے ڈی چوک اسلام آباد میں میڈیا سے گفتگو کرتے ہوئے وفاقی وزیر اطلاعات عطا تارڑ نے کہا کہ میڈیا دفاتر پر حملوں کی مذمت کرتا ہوں، شرپسند اپنی گاڑیاں، سامان اور کپڑے چھوڑ کر فرار ہوئے، پی ٹی آئی والوں نے کنٹینر کو خود آگ لگائی، کنٹینر کے نیچے دستاویز کی راکھ ہے جس میں اہم منصوبہ بندی شامل تھی۔عطا تارڑ کا کہنا تھا کہ کنٹینر جو جلایا گیا ہے اس کے نیچے کاغذوں کے ڈھیر ملے ہیں، جن کا فرانزک کرایا جائے گا، کنٹینر کو اس لیے آگ لگائی اس میں اہم دستاویز اور ثبوت تھے، دستاویز میں تھا کہاں حملے کرنے ہیں، کس کو ٹارگٹ کرنا ہے۔وفاقی وزیر اطلاعات نے مزید کہا کہ مظاہرین پارلیمنٹ ہاؤس پر قبضہ کرنا چاہتے تھے، پی ٹی آئی والے اہم شخصیات کو نشانہ بنانا چاہتے تھے اور فرار ہونے سے قبل تمام ثبوت خود جلا کر گئے ہیں، مظاہرین چپلیں، کپڑے اور گاڑیاں چھوڑ کر بھاگے ہیں، بھاگنے والوں کی گاڑیاں آپس میں ہی ٹکرا گئیں۔