سابق فاسٹ بولر کین شٹل ورتھ 80 سال کی عمر میں چل بسے

سابق انگلش فاسٹ بولر کین شٹل ورتھ 80 سال کی عمر میں انتقال کر گئے، کرکٹ شائقین میں رنج و غم کی لہر دوڑ گئی۔کین شٹل ورتھ نے 1970 سے 1971 کے دوران انگلینڈ کی جانب سے 5 ٹیسٹ اور ایک ون ڈے میچ کھیلا۔وہ 1970-71 کے دورۂ آسٹریلیا میں انگلینڈ کی مشہور ایشز جیتنے والی ٹیم کا حصہ تھے۔ فرسٹ کلاس کرکٹ میں انہوں نے لنکا شائر اور لیسٹر شائر کی نمائندگی کی۔دائیں ہاتھ کے فاسٹ بولر کین شٹل ورتھ کو لمبے رن اپ، سائیڈ آن ایکشن اور تیز رفتاری کے باعث جانا جاتا تھا۔انہوں نے اپنے فرسٹ کلاس کیریئر میں لنکا شائر کے لیے 484 وکٹیں اور لیسٹر شائر کے لیے مزید 99 وکٹیں حاصل کیں۔کین شٹل ورتھ کو 1971 میں آسٹریلیا کے خلاف ون ڈے کرکٹ کی تاریخ کے پہلے میچ میں انگلینڈ کی جانب سے پہلی ون ڈے وکٹ لینے کا بھی اعزاز حاصل ہے۔