rehber Logo

بالی ووڈکے کنگ شاہ رخ خان اور سپر اسٹار دپیکا پڈوکون کے خلاف معروف کار برینڈ ہنڈائی کی کار میں تکنیکی خرابی سامنے آنے کے بعد مقدمہ درج کر لیا گیا۔راجستھان کے شہر بھرت پور کی وکیل کیرتی سنگھ نے کار برینڈ کی مینو فیکچرنگ میں مبینہ طور پر نقائص سامنے آنے کے بعد کمپنی کے منیجنگ ڈائریکٹر، کل وقتی ڈائریکٹر، سی ای او اور شوروم مالکان کےخلاف مقدمہ درج کروایا ہے۔مقدمے میں شاہ رخ خان اور دپیکا پڈوکون کو بھی نامزد کیا گیا ہے،ا ن دونوں پر الزام ہے کہ بالی ووڈ کی یہ شخصیات خراب گاڑیوں کی تشہیر کر رہی ہیں۔

ایف آئی آر میں کیرتی سنگھ نے مؤقف اپنایا ہے کہ انہوں نے 2022 میں 23 لاکھ 97 ہزار  بھارتی روپے کی کار بینک لون پر خریدی تھی، کار خریدنے کا فیصلہ معرو ف بالی وڈ اداکاروں کے اشتہارات دیکھ کر اور برینڈ کی جانب سے کار کے مکمل طور  پر’Trouble free‘ ہونے کی یقین دہانی کے بعد کیا گیا،تاہم استعمال کے چند مہینوں کے دوران ہی کار میں تکنیکی خرابیاں سامنے آنے لگیں حتیٰ کہ ان  مسائل کی بنا پر کار کئی بار حادثے کا شکار ہوتے ہوتے بھی بچی، ڈیلرشپ سے رابطے پر انہیں بتایا گیاکہ کار کی مینوفیکچرنگ میں خرابی ہے جسے درست نہیں کیا جا سکتا۔مقدمے میں شاہ رخ اور دپیکا پڈوکون پر الزام لگایا گیا ہے کہ انہوں نے خراب پراڈکٹ کے اشتہارات کی تشہیر کر کے صارفین کو گمراہ کیا ۔
اس حوالے سے پولیس حکام کا مؤقف بھی سامنے آیا ہے جس میں بتایا گیا ہے کہ دونوں شخصیات کے خلاف ایف آئی آر درج کرکے تفتیش شروع کر دی گئی ہے۔