بھارت کے مادھوپر ڈیم سے پانی کے اخراج کی وارننگ جاری

نیشنل ڈیزاسٹر مینجمنٹ اتھارٹی (این ڈی ایم اے) نے بھارت کی طرف سے مادھوپر ڈیم سے پانی کے اخراج کی وارننگ جاری کردی۔این ڈی ایم اے نے کہا ہے کہ ہماچل پردیش، اتراکھنڈ اور پنجاب سمیت بھارتی ریاستوں میں شدید بارشیں متوقع ہیں۔مقبوضہ جموں و کشمیر میں پیر کو بھی ریکارڈ توڑ بارش ہوئی تھی، مزید شدید بارشوں کی پیش گوئی ہے۔ نیشنل ایمرجنسی آپریشن سینٹر صورتحال کا ہمہ وقت مشاہدہ کر رہا ہے۔ اگلے 48 گھنٹوں میں، دریائے راوی میں جسر کے مقام پر 80 ہزار سے ایک لاکھ 25 ہزار کیوسک بہاؤ کے ساتھ اونچے درجے کی سیلابی صورتحال متوقع ہے۔

چناب کے بالائی علاقوں میں جموں تاوی اور منور تاوی ندیوں کے بہاؤ میں بھی اضافہ ہورہا ہے۔ دریائے چناب میں مرالہ کے مقام پر ڈیڑھ لاکھ سے 2 لاکھ کیوسک کے ساتھ بہاؤ درمیانے درجے سے اونچے درجے تک پہنچ سکتا ہے۔

دریائے ستلج گنڈا سنگھ والا کے مقام پر ایک لاکھ 90 ہزار کیوسک سے 2 لاکھ 20 ہزار کے ساتھ پانی شدید بہاؤ کی حد تک پہنچ سکتا ہے۔

بھارتی ڈیم تھین (رنجیت ساگر) اپنی گنجائش کے قریب تک بھر چکا ہے اور ایئک، ڈیگ، بین، بسنتر، اور پلکھو نالوں سے اخراج اور بہاؤ میں بھی اضافے متوقع ہیں۔

وزیراعظم کے ہدایت پر این ڈی ایم اے روزانہ کی بنیاد پر اعلیٰ سطحی مون سون جائزہ اجلاس منعقد کررہا ہے اور این ای او سی تمام دستیاب وسائل کے ساتھ صورتحال کی ہمہ وقت نگرانی کر رہا ہے۔