rehber Logo

بھارتی وزیراعظم نریندرمودی کوبڑاجھٹکا،امریکی صدرڈونلڈٹرمپ نے بھارت کادورہ منسوخ کردیا۔ امریکی صدرنے کواڈسمٹ میں شرکت کیلئے بھارت جاناتھا، لیکن متعدد بار یقین دہانی کے باوجود انہوں نے یہ دورہ ترک کردیا ہے۔ غیر ملکی خبرایجنسی کی رپورٹ میں یہ دعویٰ بھی سامنے آیا ہے کہ ٹرمپ کابھارت میں کواڈ سمٹ کیلئے دورے کاکوئی ارادہ نہیں۔ یہ بات بھی سامنے آئی کہ مودی صدر ٹرمپ کے بار بار اس دعوے سے برہم تھے کہ انہوں نے بھارت اور پاکستان کے درمیان جنگ کو حل کیا ہے، وزیراعظم مودی نے کہا تھا کہ امریکا کا بھارت،پاکستان جنگ بندی میں کوئی کردار نہیں اور یہ معاملہ دونوں ممالک نے براہِ راست طے کیا ہے۔ حالیہ مہینوں میں بھارت کی جانب سے متنازع بیان بازی کے بعد امریکی صدر ڈونلڈ ٹرمپ نے رواں سال دورہ بھارت کے منصوبے ختم کردیے ہیں، فیصلہ حالیہ دنوں میں بھارت اور امریکا کے تعلقات میں پیدا ہونے والی کشیدگی کے تناظر میں سامنے آیا ہے۔

واضح رہے ٹرمپ نے روسی تیل خریدنے پر بھارت پر تعزیری محصولات عائد کیے تھے جس کے بعد دونوں ممالک کے تعلقات میں تناؤ بڑھا۔