rehber Logo

سہ ملکی سیریز کے دوسرے میچ میں پاکستان اور یو اے ای کا آج ٹاکرا ہوگا۔دونوں ٹیموں کا ٹرائنگولر سیریز میں شارجہ میں سامنا ہوگا، پاکستانی ٹیم فتح کیلئے پُرعزم ہے، دوسری جانب میزبان ٹیم نے بھی بہتر کارکردگی پیش کرنے کا عزم کر لیا، کپتان محمد وسیم نے کہا کہ ایشیا کی 2 بڑی ٹیموں کے خلاف کھیلنے کا موقع ہماری ترقی کے سفر میں ایک اور سنگِ میل اور قابل فخر ہے۔

یو اے ای کے کپتان کا کہنا تھا کہ ہم افغانستان، نیوزی لینڈ اور بنگلہ دیش کو ہرا چکے ہیں، بطور ایسوسی ایٹ ٹیم بہترین ٹیموں کے خلاف کھیلنا ہمارے لئے اہم بات ہے، اپنی تیاریوں کو دیکھتے ہوئے مجھے لگتا ہے کہ اس سیریز میں بھی ہمارا کھیل بہتر رہے گا۔ اماراتی سکواڈ تجربے اور نوجوان پلیئرز کا بہترین امتزاج ہے، بعض ینگسٹرز بہت اچھا کھیل پیش کررہے ہیں، میں ان کی کارکردگی اور تیاری سے بہت خوش ہوں، مجھے پورا اعتماد ہے کہ ہم اچھی کرکٹ کھیلیں گے اور ڈٹ کر حریفوں سے مقابلہ کریں گے۔

محمد وسیم کا کہنا تھا کہ شارجہ ایک طرح سے تینوں ہی ٹیموں کا ہوم گراؤنڈ ہے، البتہ جس طرح ہم ڈیڑھ مہینے سے تیاریاں کر رہے ہیں اور گزشتہ چند برسوں میں کارکردگی دکھائی اس کے مدنظر مجھے لگتا ہے کہ اچھی کرکٹ کھیلیں گے۔