چین میں سابق اعلیٰ سرکاری افسر کو رشوت لینے پر سزائے موت سنا دی گئی

مشرقی چین کی ایک عدالت نے اسٹیٹ اونڈ ایسٹس سپرویژن اینڈ ایڈمنسٹریشن کمیشن کے سابق نائب وزیر سطح کے افسر لو یو لن کو 30.7 ملین امریکی ڈالر کی رشوت لینے کے الزام میں سزائے موت سنا دی ہے، جس پر دو سال کی معطلی کے بعد عملدرآمد ہوگا۔آرگنائزیشن آف کرائم اینڈ کرپشن رپورٹنگ پراجیکٹ کی ایک رپورٹ کے مطابق اگرچہ ایسے مقدمات میں سزائے موت کو بعد ازاں عمر قید میں بدل دیا جاتا ہے تاہم عدالت نے واضح کیا ہے کہ لو یو لن کو عمر بھر بغیر پیرول یا سزا میں کمی کے جیل میں رکھا جائے گا۔عدالت نے رشوت کے علاوہ خفیہ اسٹاک مارکیٹ معلومات افشاء کرنے کے الزام میں بھی لو یو لن کو 6 سال قید اور 11 لاکھ ڈالر جرمانے کی سزا سنائی ہے۔حکام نے لو یو لن کی تمام جائیدادیں ضبط کر لی ہیں اور زیادہ تر غیر قانونی فنڈز بھی بازیاب کر لیے گئے ہیں۔