rehber Logo

عورت مارچ اسلام آباد کے منتظمین کی جانب سے قتل کی گئی کم عمر ٹک ٹاکر ثنا یوسف کو انصاف دلانے کے لیے مظاہرہ کیا گیا،جس میں عام شہریوں نے بھی شرکت کی۔ثنا یوسف کو 2 جون کو ان کے گھر میں گھس کر فائرنگ کرکے قتل کیا گیا تھا، پولیس نے ایکشن لیتے ہوئے 3 جون کو ملزم کے خلاف مقدمہ دائر کرکے اسے گرفتار کرلیا تھا۔پولیس نے بتایا تھا کہ 17 سالہ ثنا یوسف کو فیصل آباد سے تعلق رکھنے والے 22 سالہ ملزم عمر حیات نے دوستی سے انکار پر قتل کیا۔ثنا یوسف کے قتل کے خلاف شوبز شخصیات سمیت سیاسی و سماجی شخصیات نے بھی اظہار افسوس کرتے ہوئے قاتل کو سخت سے سخت سزا دینے کا مطالبہ کیا ہے اور اب اسلام آباد میں عورت مارچ کے منتظمین کی جانب سے مقتولہ کو انصاف دلانے کے لیے مظاہرہ کیا گیا۔

عورت مارچ کی جانب سے اسلام آباد پریس کلب کے باہر ثنا یوسف کو انصاف دلانے کے لیے مظاہرہ کیا گیا، جس میں بڑی تعداد میں نوجوان افراد نے شرکت کی اور قاتل کو سخت سے سخت سزا دینے کا مطالبہ کیا۔مظاہرین نے میرا جسم، میری مرضی سمیت دیگر نعرے بھی لگائے جب کہ انہوں نے مختلف نعروں کے بینرز بھی اٹھا رکھے تھے۔مظاہرین نے غیرت کے نام پر قتل کرنے والا سب سے بڑا بیغیرت ہے اور انکار کرنا میرا حق ہے جیسے نعروں کے بینرز بھی اٹھا رکھے تھے۔مظاہرین نے حکومت، پولیس اور عدالتوں سے مطالبہ کیا کہ وہ ثنا یوسف کے قاتل کو مثالی سزا دے کر باقی ملزمان کی حوصلہ شکنی اور لڑکیوں کے تحفظ کو یقینی بنائیں۔عورت مارچ اسلام آباد کی جانب سے مظاہرے کی تصاویر اور ویڈیوز بھی شیئر کی گئیں، جنہیں دیگر سوشل میڈیا پیجز کی جانب سے بھی شیئر کیا گیا۔ثنا یوسف کو انصاف دلانے کے لیے نکالے گئے مظاہرے میں گھروں میں کام کرنے والی ملازم خواتین بھی شریک ہوئیں جبکہ طالبات سمیت دیگر ملازمت پیشہ خواتین اور مرد حضرات بھی مظاہرے میں شریک ہوئے۔