rehber Logo

فیڈرل انویسٹی گیشن ایجنسی (ایف آئی اے) نے کارروائی کر کے سمندر کے راستے شہریوں کو یورپ بھجوانے میں ملوث سمگلرز سمیت 4 ایجنٹ گرفتار کر لئے۔ ایف آئی اے گوجرانوالہ زون نے گوجرانوالہ اور گجرات کے مختلف علاقوں میں کارروائیاں کرتے ہوئے ملزمان کو گرفتار کیا، جن کی شناخت بشارت حسین، شاہ زیب عرف سونو، مظہراقبال اور شاہد رسول کے ناموں سے ہوئی۔

حکام کا کہنا ہے کہ گرفتار ملزم بشارت حسین نے شہری کو سمندر کے راستے اٹلی بھجوانے کے لئے 60 لاکھ روپے سے زائد وصول کئے اور یونان کے بجائے لیبیا بھجوایا، ملزم اور اس کے ساتھیوں نے شہری کو لیبیا کے سیف ہاؤسز میں محصور رکھ کر تاوان کا مطالبہ کیا۔ملزم نے شہری کو کشتی کے ذریعے غیر قانونی طور پر لیبیا سے یونان سمگل کی کوشش کی، جس پر شہری نے سمندر کے راستے یورپ جانے سے انکار کر دیا اور پاکستان واپس آ گیا۔

 انسانی سمگلر شاہ زیب نے شہریوں کو کینیڈا بھجوانے کے لئے 80 لاکھ روپے فی کس ہتھیائے، شہریوں کو دھوکے سے کینیڈا کے بجائے ایران بھجوا دیا، وہاں انہیں محصور کر کے تاوان کا مطالبہ کیا۔

ملزم مظہر اقبال نے شہری کو کینیڈا میں ملازمت دلوانے کی غرض سے 94 لاکھ روپے ہتھیائے 

ملزم شاہد رسول نے شہری کو کینیڈا ملازمت کا جھانسہ دے کر 20 لاکھ روپے سے زائد وصول کیے۔
 چاروں ملزمان شہریوں کو بیرون ملک بھجوانے میں ناکام رہے اور روپوش ہوگئے، ملزمان کو گرفتار کر کے تفتیش کا آغاز کر دیا گیا ہے۔