بھارتی ٹائیکون گوتم اڈانی پر امریکہ میں فرد جرم عائد

بھارتی ٹائیکون گوتم اڈانی پر نیویارک کی عدالت نے مبینہ فراڈ سکیم میں فرد جرم عائد کردی۔ گوتم اڈانی، ساگر اڈانی سمیت پانچ دیگر افراد پر فرد جرم عائد کی گئی ہے۔ گوتم اڈانی پر حکومت سے معاہدے کیلئے سرکاری اہلکاروں کو رشوت دینے کا الزام ہے،خبر ایجنسی کے مطابق گوتم اڈانی پر امریکی سرمایہ کاروں کو گمراہ کرنے کا بھی الزام ہے۔ نیو یارک میں دائر کیے گئے مجرمانہ الزامات 62 سالہ گوتم اڈانی کے لیے تازہ ترین دھچکا ہیں۔استغاثہ نے فرد جرم عائد کرتے ہوئے بھارتی بزنس مین پر الزام عائد کیا ہے کہ گوتم اور دیگر سینئر ایگزیکٹوز نے اپنی قابل تجدید توانائی کمپنی کے ٹھیکے حاصل کرنے کیلئے بھارتی حکام کو ادائیگیوں پر رضامندی ظاہر کی تھی جس سے 20 سال میں 2 ارب ڈالر سے زائد کا منافع حاصل ہونے کی توقع ہے۔