rehber Logo

شہر کے مختلف علاقوں میں مبینہ پولیس مقابلوں کے دوران چار ڈاکوؤں کو زخمی حالت میں گرفتار کر لیا گیا، جبکہ اسلحہ، موبائل فونز اور موٹرسائیکلیں برآمد کر لی گئیں۔پولیس اور چھیپا حکام کے مطابق کراچی کے علاقے نارتھ ناظم آباد بلاک ایچ میں حیدری مارکیٹ پولیس اور ملزمان کے درمیان فائرنگ کا تبادلہ ہوا، جس کے نتیجے میں ایک ملزم زخمی حالت میں گرفتار کر لیا گیا۔گرفتار ملزم کی شناخت فیضان کے نام سے ہوئی ہے، جسے طبی امداد کیلئے عباسی شہید اسپتال منتقل کر دیا گیا۔ پولیس کے مطابق ملزم کے قبضے سے اسلحہ، موبائل فون اور موٹرسائیکل برآمد کی گئی۔شاہ لطیف پولیس نے لانڈھی ظفر ٹاؤن کے قریب مبینہ مقابلے کے بعد دو ڈاکوؤں کو زخمی حالت میں گرفتار کیا۔

زخمی ملزمان کو فوری طور پر جناح پوسٹ گریجویٹ میڈیکل سینٹر منتقل کیا گیا، جہاں ان کی شناخت عباس اور نیاز کے ناموں سے کی گئی۔ گرفتار ملزمان سے دو پستولیں، چار موبائل فونز، نقد رقم اور موٹرسائیکل برآمد کی گئی ہے۔ رکن پور میں بھی پولیس اور ڈاکوؤں کے درمیان فائرنگ کا تبادلہ ہوا، جس کے نتیجے میں ایک ڈاکو زخمی حالت میں گرفتار کر لیا گیا۔ ملزم کے خلاف مقدمہ درج کر کے مزید تفتیش شروع کر دی گئی ہے۔